Naglusulos idi kalman ti Prime Minister iti Nepal a ni K.P. Sharma Oli kasaruno ti tignay protesta a napasamak mainaig iti social media ban.
Maipalagip nga idi laeng Lunes, nagprotesta dagiti tattao iti Nepalese Parliament building nu sadino, 19 a tattao ti nakumpirmar a pimmusay maibasar iti kaudian nga impormasyon bayat a ginasgasut met dagiti nadangran.
Gapu iti tensyon, impaisidong ti gobyerno iti curfew ti Nepalese Parliament building kasta metten ti government secretariat, presidential house,ken daduma pay a key parts iti capital city a Kathmandu.
Nupay kasta, maatap nga inuram dagiti nagprotesta ti pagnanaedan dagiti daduma a politiko sadiay pakairamanan iti balay ti kadaklan a party iti Nepali Congress a ni Sher Bahadur Deuba; President Ram Chandra Poudel; Home Minister Ramesh ken ti lider ti Communist Party iti Nepal Maoist a ni Pushpa Kamal Dahal.
Malaksid a saan a nagustwan dagiti nagrally ti social media ban, maysa metlaeng nga ipukpukkawda ti panakaisardeng ti korapsyon iti nasao nga Himalayan country.
