Impasigurado ti Malacañang a saan a maitantan dagiti proyekto ken operasion ti gobierno iti baet ti impeachment proceedings kontra kenni Vice President Sara Duterte.
Sigun kenni Palace Press Officer USec. Claire Castro, ituloy ti executive branch ti trabahona iti laksid ti aniaman nga isyu ken saan a maitantan dagiti programa ti administrasion gapu kadagiti “obstructionists.”
Iti biang ti Senado, impetteng ti Malacañang nga adda ti bukod a mandato dagiti senador kas impeachment court ken legislators.
Namnamaen ti Palasyo a maileppas ti Senado ti trabaho dagitoy ken saan a mapasamak ti boycott kadagiti sesyon.
Kabayatanna, kinuna ti Malacañang a panggep ti transparency ken accountability ket para iti umili ken saan a pakaigapuanan ti division.
Kasaruno daytoy iti maatap a public division gapu iti impeachment.
Sigun kenni Atty. Castro, ti pudno a rason ti panagsisina ket dagiti palso a damag ken ti gandat a mangilemmeng iti ebidensia.
Innayon ti Palace official nga ad-adda a magun-od ti panagkaykaysa no maibutaktak ti kinapudno ken ti nainget a panagsulkimat ti publiko kadagiti impormasion.
