BAGUIO CITY – Naibaluden ti pulis a nangpaltog iti maysa a kailian a pulis sadiay Batasan Hills, Quezon City idi kanikadua nga immuna a pinagparangda nga insidente ti panagpakamatay.
Nabigbig ti biktima a ni PCpl. Higinio Calion Wayan, 31-anyos, tubo ti Loo, Buguias, Benguet.
Nabigbig met ti suspek a ni PCpl. Sherwin Rebot.
Nairaman a natiliw iti insidente ni PCpl. Harold Mendoza gapu iti kaso nga obstruction of justice.
Bin-ig a nakadestino dagitoy iti Kamuning Police Station 10 sadiay Quezon City.
Iti inisyal a report ti pulisya, insalaysay da Rebot ken Mendoza, pakairamanan ti sibilyan a ni Lorenzo Lapay a nagpakamatay ni Wayan iti parbangon idi Dominggo, May 30 iti uneg ti balay a nag-iinuman dagitoy.
Iti umuna nga statement ni Rebot, kinunana a nagturong daytoy iti restroom ken naibatina ti paltogna iti lamisaan.
Inyangaw kanu ni Wayan nga alaenna ti paltog ni Rebot ken imputokna iti barukongna.
Nupay kasta, babaen iti nainget nga imbestigasyon ti Criminal Investigation and Detection Unit ket inaklon ni Lapay a napasamak ti pammaltog idi nakaunget ni Rebot kalpasan a naabak iti sanggolda kenni Wayan.
Kinuna ni Lapay a nakaturog ni Mendoza idi napasamak ti insidente.
Sumangsangon iti kaso nga administratibo ti dua a pulis malaksid pay iti kaso a kriminal, malaksid iti kaso a panaglabsing iti illegal possession of firearms and ammunition kontra kenni Rebot gapu iti maysa pay a paltog a nakita kenkuana.
