BAGUIO CITY – Pimmusay ti maysa a pulis kalpasan a dinungpar ti dump truck ti inmanehona a motorsiklo sadiay Longlong Road, La Trinidad Benguet itay kanikadua.
Nabigbig daytoy a ni PCPL Evereth Yong-en Ballo, 28-anyos, naasawaan, miembro ti PNP a nakadestino iti PIU BPPO, tubo ti Buguias, Benguet ken residente ti Teb-Teb, Balil, La Trinidad Benguet.
Nabigbig met ti driver ti truck a ni Jirdan Dela Cruz Pino, 23-anyos, baro, driver, tubo ti Itogon, Benguet ken residente ti Palmaville, Puguis, La Trinidad Benguet.
Maibasar iti report, nagtaud ti dump truck iti direksyon ti Timoy, Longlong, La Trinidad, Benguet ken agturong koma sadiay Palmaville, Puguis idi nag-overtake ti maysa pay a truck rason a nadungparna ti motorsiklo ti pulis nga adda met iti sabali a linya nga agturong koma sadiay Irisan, Baguio City.
Gapu iti daytoy, nagsagrap ti biktima ti dunor iti sumagmamano a paset ti bagina ken nadadael pay ti motorsiklo.
Dagus met a naiturong ti biktima iti ospital ngem pimmusay daytoy idi kalman.
