BAGUIO CITY – Naka-heightened alert ita ti Abra Provincial Police Office ken ti Armed Forces of the Philippines gapu iti presensiya dagiti maatap a kameng ti New People’s Army (NPA) sadiay probinsia ti Abra.
Sigun kenni Abra Governor Maria Jocelyn Bernos, imbistigaran metlaeng ti Cordillera Police dagiti kameng ti Malibcong MPS a naka-duty idi immatake dagiti NPA iti temporary base dagitoy.
Kinunana a napaawid dagiti amin a pulis a naka-deploy sadiay munisipyo ti Malibcong ken sumukat kadagitoy dagiti pulis nga agtaud iti regional headquarters.
Kabayatanna, inaklon pay ti gobernadora nga apektado dagiti umili ti Malibcong, nangruna dagiti estudyante gapu paylaeng iti presensia dagiti maatap nga NPA sadiay.
Nupay kasta, impasiguradona nga agtignay ti lokal a gobyerno ken ti law enforcement tapnu maisubli ti linak ken kappia iti nasao a lugar.
Maipalagip nga itay kanikadua ket nadangran ti lima a pulis iti panagsaneb dagiti NPA iti convoy ni PSSupt. Alexander Tagum a paturong kuma iti temporary base ti Malibcong Municipal Police Station nga immunan nga inatake ti rebelde a grupo.
