BAGUIO CITY – Opisyalen a nabigbig kas baro a kameng ti Philippine National Police dagiti 366 a pulis a nangbukel iti Class 2020-03 “Bagsik-Alab” kalpasan ti panangkompletoda iti Public Safety Field Training Program Phase II-OJT/FTX dagitoy.
Iti naisayangkat a closing ceremony ti nasao a programa, naipaay kadagiti baro a pulis ti PNP badge ken Certificate of Completion dagitoy.
Nagserbi a highlights ti seremonya ti panakaipaay dagiti medalya kadagiti miembro ti “Bagsik-Alab” a nangipakita iti naisangsangayan a performance kadagiti academic ken non-academic subjects.
Naipaay ti Medalya ng Kasanayan wenno PNP Efficiency Medal kenni Patrolman Joshua Buhay kalpasan a naalana ti kangatuan a rating iti entero a klase.
Naipaay met ti Medalya ng Papuri wenno PNP Commendation Medal kada Patrolman Elorde Wagayen a nakaala iti maikadua a kangatuan a rating ken Patrolman Rex Catalino a nakaala iti maikatlo a kangatuan a rating.
Naipaay pay ti Leadership Award kada Patrolman John Rico Santillan a Class Battalion Commander ken Patrolman Gomez Pok-uh a Class President.
Kinablaawan ket kinarit met ni PBGen. Ronald Oliver Lee, Regional Director ti Police Regional Office Cordillera dagiti baro a pulis iti panagbalinda a role model wenno pagwadan ken iti panagbalinda a nadisiplina a police officers iti Cordillera Region.
Kinunana nga iti panagleppas ti field training dagiti nasao a pulis ket marugian met ti ad-adda a napnuan karit nga akemda kas public servants.
Impalagipna pay kadagiti baro a pulis ti kanayon a panagtungpal dagitoy iti Intensified Cleanliness Policy ni PNP Chief Gen. Guillermo Eleazar.
