BAGUIO CITY – Nainget a bambantayan ti Department of Agriculture (DA) ken dagiti dadduma pay a maseknan nga opisina ken ahensia dagiti nabigbig a critical points kadagiti na-quarantine checkpoints ditoy rehion Cordillera.
Kasaruno daytoy ti panagpositibo iti African Swine Fever dagiti 10 a blood samples dagiti natay a baboy manipud sadiay Rizal.
Sigun kenni DA-Cordillera regional director Cameron Odsey, wanwanawanandan dagiti checkpoints a pauneg ditoy rehion kas iti Cervantes Road ken dagiti national highways a Kennon Road, Naguilian Road ken Marcos Highway.
Nakaalerto met dagiti kameng ti DA a mangpasangbay kadagiti maibibiyahe a baboy sadiay Kalinga, Abra, Apayao, Ifugao ken Mt. Province.
Kinuna pay ni Odsey a makibinbinnadang ti ahensia iti kapulisan, kadagiti nagduduma a veterinary offices ti rehion ken ti Department of Health tapno malapdan ti iseserrek ditoy rehion dagiti baboy a naapektaran iti African Swine Fever.
Kabayatanna, impetteng ti opisyal nga awan iti health hazard ken saan a maiyakar iti tao ti nasao a sakit dagiti baboy.
Kasaruno daytoy ti maaw-awatda nga impormasyon nga adda dagiti sumagmamano a residente nga agamak iti posible a dakes nga epekto dagiti maipauneg a karne ti baboy nga apektado iti nasao a virus.
Nupay kasta, kinunana a nasken latta ti pananginspeksion kadagiti maiserserrek a baboy ditoy lokalidad tapno saanen a makaalis kadagiti dadduma pay a baboy a mangitunda iti panakatay dagitoy. (-with Bombo Charles Nikko Limon)
