BAGUIO CITY – Kapada ita ti rebelde a New People’s Army (NPA) dagiti ISIS, Abu Sayyaf ken dagiti dadduma nga organisasyon nga agar-aramat iti Improvised Explosive Devices (IEDs) kas armas iti panagkikil, pammutbuteng ken iti terorismo.
Impeksa daytoy ti Cordillera PNP kagiddan ti panangkunada a naminsan pay ket impada ti Leonardo Pacsi Command ti NPA-Mt. Province ti grupoda kadagiti nasao nga organisasyon gapu iti panagaramatda iti IEDs wenno landmines kontra iti tropa ti gobyerno.
Kinuna ti pulisya a daytoy ti pammaneknek iti kinadesperado ti rebelde a grupo kagiddan ti saanen a panangbigbig kadakuada ti kagimongan ken iti panagbalindan a bandido ken ‘peace saboteurs’ wenno manangsabotahe iti kappia.
Sigun iti Cordillera PNP, dagiti laeng terorista ti agar-aramat iti IEDs wenno landmines a nainget a maipawpawil iti International Humanitarian Law ken iti Geneva Conventions gapu iti risgo a dagiti sibilyan ti mabiktima kadagitoy.
Maipalagip a pimmusay ti maysa a pulis bayat a nadangran ti siyam a kakadwana kalpasan a bimtak ti IED nga inkali dagiti rebelde kabayatan ti panangkamatda kadagitoy idi Martes sadiay Tadian, Mountain Province.
Nupay kasta, guyguyuguyen latta dagiti pulis ken militar ti panagsuko dagiti rebelde nga NPA tapnu maaddaan dagitoy iti nataltalna a biag.
