Insingasing ti maysa nga opisial ti gobierno ita nga aldaw a kasapulan nga aprobaran ni President Ferdinand “Bongbong” Marcos Jr. ti “regular rotation and resupply (RORE) missions” iti Ayungin Shoal idiay West Philippine Sea sakbay a maipatungpal daytoy.
Sigun kenni Commodore Jay Tarriela, Philippine Coast Guard (PCG) spokesperson for the West Philippine Sea, ti singasing ket manipod iti rekomendasion ti Presidente ti National Maritime Council a naangay iti maikadua a gundaway sadiay Malacañang idi kalman.
Maipalagip a ni Executive Secretary Lucas Bersamin ti dadaulo ti National Maritime Council nu sadinno, binukel daytoy ni President Marcos idi Marso tapno mapapigsa ti seguridad ti baybay ti Pilipinas iti baet ti kinaranggas nga ar-aramiden ti China idiay West Philippine Sea.
Kabayatanna, dagiti bilin ket manipod kenni National Security Adviser Eduardo Año iti kabaelanna kas chairman ti National Task Force on the West Philippine Sea.
Itay laeng nabiit, kinuna gamin ni Bersamin idiay Malakanyang nga awan ti nakitana a dakes iti panangipakaammona kadagiti “regular rotation and resupply (RORE) missions”, nga agtalinaed a “routine” ken regular a maiyeskediul daytoy.
