ABRA-Nagsublin dagiti agarup sangagasut sangapulo ket walo a pamilya a residente kadagiti bukodda a pagtaengan kalpasan a nagbakwit dagitoy gapu iti napasamak a rinnupak iti nagbaetan ti 50th Infantry Battalion ken miyembro ti Kilusang Larangang Guerilla (KLG) North-Abra idiay Barangay Nagcanasan, Pilar, Abra idi Martes, Abril 2.
Iti interview ti Bombo Radyo kenni Army Major Rigor Pamittan, spokesperson ti 5th Infantry Division Philippine Army, nagsardengen ti rinnupak nupay kasta agtultuloy latta ti panagmatmat dagitoy.
Sigun kenkuana, mapatpatta a nasurok tallo pulo a kameng ti rebelde ti nakarinnupak dagitoy kas maibasar kadagiti nakumpiskar nga alikamen dagiti nasao a rebelde.
Innayonna nga awan met ti nadangran a residente bayat ti nasao nga engkwentro.
Kabayatanna, nagballaag met daytoy iti publiko tapno dagus nga ireportda kadagiti otoridad apaman nga adda makitada nga adda pakainaganna iti daytoy.
Iti agdama, agtultuloy ti intensified pursuit operation dagitoy tapno mabirukan dagiti kameng ti rebelde.//Bombo Rosemarie Bulsao
