Impakaammo iti Bogo City Health Office nga agsagsagrap ita ti daduma kadagiti bakwit idiay Cebu iti respiratory illnesses kas iti uyek, gurigor, ken panateng.
Maysa a makitkita a rason iti daytoy ti panagturogda iti ruar iti baet ti nalamiis nga angin gapu ta agtaltalinaedda paylaeng kadagiti tent kalpasan a nadadael dagiti pagtaenganda gapu iti magnitude 6.9 a gingginged a dimmalapos idi ngudo ti Setyembre.
Sigun iti maysa nga health officer, dumanon iti 80 agingga 100 a pasyente ti agpakpakonsulta tunggal field work dagitoy bayat nga agingga met 80 ti iyak-akomodar iti city health office tunggal aldaw.
Iti baet nga addan iti medisina ken bitamina a naiwaras,impetteng ti health officer a saan a maliklikan ti panagraira iti nasao a sakit gapu ta nagdadapon dagiti bakwit iti maysa a lugar.
Kabayatanna, impakaammo metten iti health consultant iti Cebu Provincial Capitol nga operational itan dagiti 16 a pagagasan iti nasao a probinsya ngem agtaltalinaed nga off limits ti emergency ken operating rooms dagitoy a kasapulan pay a mainspeksyon ken ma-assess.
Mainaig iti dayta, impakaammo iti Taipei Economic and Cultural Office (TECO) iti Pilipinas a mangidonar ti Taiwan iti US$200,000 kas tulong kadsgiti naapektaran iti ginggined.
Sigun iti nasao nga opisina, maidanon daytoy babaen iti Manila Economic and Cultural Office (MECO) ken manamnama pay a mapasarunwan kadagiti kanayonan a relief materials.
Daytoy ket kagiddan iti panangrambak iti nasao a pagilian iti maika-114 a National Day ita nga aldaw.
