BAGUIO CITY-Nadiskubre ken dinadael dagiti otoridad ti dua a plantasyon ti marijuana sadiay New Balbalan, Lacnog, Tabuk City, Kalinga.
Maibasar iti report, pinarot ken inuram dagiti otoridad dagiti 4,000 a pidaso ti fully grown marijuana ken 2,000 a marijuana seeds iti 400 sqm a lote iti nasao a lugar.
Naamuan nga aggatad iti P880,000 dagiti nadadael a marijuana.
Awan met ti nakemmeg a cultivator kadagiti nadiskubre a marijuana plants.
Kabayatana,
Nakemmeg ti No.7 Top Most wanted person iti manhunt operation nga insayangkat dagiti kameng ti Ifugao Police Provincial Office sadiay La Trinidad, Benguet idi laeng kanikadua.
Nabigbig ti suspek a ni Bartolome Balajo Dag-o, Jr. 29-anyos , gapu iti kasona a panaglabsing iti RA 7610 wenno ti Special Protection of Children Against Abuse, Exploitation and Discrimination Act partikular ti panagrames.
Sigun kenni Ifugao PPO Provincial Director, PCol. David Mariano, nabayagen nga an-anopen dagiti otoridad ti nasao nga suspek.
Iti agdama ket addan iti kustodiya ti Lamut MPS ti nasao a suspek para iti disposisyon ti kaso daytoy.
Nakemmeg met iti maikadwa a gundaway ti maysa a drug personality kasaruno iti naipatungpal a search warrant dagiti otoridad sadiay Sabangan, Mt. Province
Nabigbig daytoy a ni Rizaldo Ngilac Pilo, 31 anyos, maysa a mannalon, tubo ti Banao, Bauko ken residente ti Nacagang, Tambingan, Sabangan, Mountain Province
Maibasar iti report, nakakumpiskar dagiti otoridad iti innem pakete ti maatap a shabu nga agdagsen iti nasurok 3 a gramo ken aggatad iti P20, 400
Malaksid iti dayta, nakakumpiskar pay dagitoy iti nagduduma a drug paraphernalia
Naamuan nga inmunan a naarestar ti nasao a suspek iti kapada a kaso ngem naipaayan daytoy iti probation idi 2019.
Nupay kasta, sumangsango daytoyen iti panaglabsing iti RA 9165 wenno Comprehensive Dangerous Drug Act of 2002.
