BAGUIO CITY – Pinarut ken inuram dagiti operatiba ti rinibribo a puon dagiti dadakkel a marijuana nga aggatad ti P5.2-M manipud iti dua a pagmulaan sadiay Barangay Butbut Proper, Tinglayan, Kalinga idi napalabas a lawas, June 29, 2021.
Maibasar iti report, inyemplementar dagiti operatiba ti eradication operation a naawagan ti Oplan 17 Patpat iti kabambantayan ti Barangay Butbut Proper a nangitunda iti panakadiskobre ti dua a pagmulaan ti marijuana nga addaan kalawa a 2,000 square meters.
Nadiskobre iti umuna a pagmulaan ti 6,000 a puon ti dadakkel a marijuana bayat a nadiskobre iti maikadua a pagmulaan ti 20,000 a puon ti dadakkel a marijuana.
Dagus nga inuram dagiti operatiba dagiti pinarut dagitoy a rinibribo a puon ti marijuana.
Nupay kasta, awan ti natiliw a marijuana cultivator kabayatan ti nasao nga operasyon.
