BAGUIO CITY – Maim-imbestigaran ita ti rinibribo a nagpaso a reverse transcription chain reaction (RT-PCR) test kits nga inted ti DOH-Research Institute for Tropical Medicine (RITM) iti maysa a pribado a diagnostic center ditoy Baguio City.
Sigun kenni Mayor Benjamin Magalong, aramaten kuma ti nasao a diagnostic center dagiti nasao a test kits ngem naduktalan a nagpason dagitoy.
Kinunana nga adda dagiti nagpaso idi pay October 10 ken October 15 ken idi napalabas a bulan ti Nobyembre.
Gapu iti daytoy, dagus a nagreklamoda iti DOH ken iti National Inter-Agency Task Force tapnu maimbestigaran ti insidente.
Innayonna a naduktalanda a nakaawat met dagiti dadduma a lokal a gobyerno ken pribado nga ospital ken laboratoryo iti kapada a kaadu dagiti nagpaso metlaeng a COVID-19 test kits manipud iti RITM.
Atapen pay ti Contact Tracing Czar a saan laeng a ginasgasut a ribo a nagpaso a test kits ti adda iti ikot ti DOH-RITM.
Nupay kasta, mangnamnama latta ni Mayor Magalong a nainget a maimbestigaran ti insidente ken ur-urayenda laengen ti resulta ti imbestigasyon.
