BAGUIO CITY – Posible a maipatungpal manen ti sabali a ritual sakbay ti pannakaitabon wenno inton malinisan ti nakapasamakan ti pannagregaay ti daga a nakatayan ti sangapulo nga indibidual sadiay Purok 2, Guisad Surong, Baguio City.
Iti pannakiuman ti Bombo Raydo kenni Councilor Maximo Hilario Edwin, IPMR representative iti siudad ti Baguio, kinunana a daytoy ti maysa a wagas a maipakita ti pannakipagrikna kadagiti pamilya a napukawan iti biag iti baet a nagtaod iti sabali a tribo wenno saan nga IP.
Maipalagip nga adda ti immuna a ritual nga inaramid dagitoy idi Agosto 11 a pinasetan dagiti opisyales ti Barangay, volunteers, responders, ken dadduma pay.
Ti nasao a ritual ket para iti cleansing, pannakaikkat ti “malas” ken dadduma pay.
Iti sabali a bangir, tuloy-tuloy ladta ti donasyon a maaw-awat dagiti apektado manipud iti nagduduma a grupo, organisasyon, indibidual ken dadduma pay.
Sigun kenni Raymond Aboen Jr., representative ti Bell-kenz foundation, saan laeng a groceries, toiletries ken dadduma a kagawaan ti impaay dagitoy a tulong no diket kasta metlaeng ti financial assistance.
Inlawlawag daytoy a saan laeng a dagiti pamilya ti pimmusay ti naipaayan iti tulong no diket, uray metlaeng dagiti pamilya nga adda iti evacuation center.
Kabayatanna, impeksa ni Aboen a silulukat ti foundation iti amin nga agkasapulan iti tulong.//via Bombo Noveh Organo
