BAGUIO CITY – Parikut dagiti kameng ti pulisya ti saan a dagus a panangireport wenno panangipakaammo kadagiti mapaspasamak nga animal abuse wenno cruelty.
Karamanen ditoy ti panangparti ken panangluto iti karne ti aso.
Iti interview ti Bombo Radyo kenni PMaj. Harriet Bulcio, panakangiwat ti Baguio City Police Office, adda ti linteg seknan iti animal abuse ken dagiti exemptions a kasapulan a tungpalen ken suroten ti tunggal maysa.
Inlawlawag ni PMaj. Bulcio nga adda dagiti sumagmamano a gundaway a mapalubosan ti panangpapatay ken panangparti ti aso laketdi maaramt daytoy kas paset ti ritual/religious ceremony wenno addaan daytoy ti makaakar a sakit.
Nupay kasta, impasigurado ti nasao nga opisyal nga agtultuloy ti panagbantay dagiti kameng ti pulisya kadagiti barangay babaen iti panakitinnulongda kadagiti opisyales.
Daytoy ket tapno malapdan dagiti aniaman a kita ti animal abuse.
Nainget pay ti panangipakaammoda kadagiti residente seknan iti linteg kontra animal abuse.
Maipalagip a nakairekord ti opisina ti lima a kaso ti animal cruelty ita a tawen.
