BAGUIO CITY – Nagpalawag ti ama ti La Trinidad, Benguet iti saan a panaka-aramat amin dagiti COVID-19 test a nailatang para iti munisipyo iti marathon testing idi napalabas a lawas iti BLISTT Area ken iti Mankayan, Benguet nga inisponsoran ti Bases Conversion and Development Authority (BCDA).
Iti interview ti Bombo Radyo Baguio, dinakamat ni Mayor Romeo Salda a puntiryada a maipasidong kuma ti nasurok 1,000 a porters ken packers kadagiti vegetable trading centers sadiay iti naisayangkat a mass testing.
Nupay kasta, kinunana a naigiddan nga adu a nateng ti naiturong kadagiti trading centers isut gapuna a manmano laeng dagiti nagpa-swab test.
Naamuan a dumanon laeng iti 512 dagiti nagnumar iti nasao a marathon testing.
Dinakamatna pay a maawatanna ti saan a panagpa-swab test dagiti dadduma gaputa mas pinili dagitoy ti agtrabaho tapnu adda ti gastuenda ita a Paskua nangrunata saanda a makatrabaho iti uneg ti tallo nga aldaw no agpa-swab test dagitoy.
Iti baet daytoy, kinuna ni Mayor Salda nga adda met latta ti libre a swab testing iti provincial triage.
Maipalagip nga impeksa ni Baguio Mayor Benjamin Magalong ti panakadismayana iti saan a panaka-aramat amin a nailatang a test kits para kadagiti munisipyo ti Benguet a nagnumar iti nasao a tulong manipud BCDA.
