BAGUIO CITY – Nagrugin ti panakaital-o ti Sakura Park sadiay Paoay, Atok, Benguet.
Kinuna ni Felix Pedro, agricultural technologist ti Municipal Agriculture Office, nga adda metten dagiti sangaili nga agturturong iti nasao a parke kalpasan ti pormal a panakaiyusuat daytoy idi napalabas a bulan ti Disyembre.
Segun kenkuana, nupay saan pay laeng a dimmakel dagiti cherry blossoms ket addan dagiti agturturong tapnu agpicnic sadiay.
Kinunana met nga agtultuloy ti panangmantinirda iti parke agingga nga agbunga daytoy kalpasan ti tallo a tawen.
Maipalagip nga idi Hulyo ti napalabas a tawen ket dumanon iti agarup sangagasut a sakura trees ken oak trees ti naimula sadiay.
Naamuan nga adda ti singasing ni Benguet Rep. Ronald Cosalan para iti panakapapintas ti kalsada a paturong iti ayan ti Sakura Park, ken paset met laeng ti panakaital-o daytoy kas tourism destination ti Atok.
