Nagbalinen a linteg ti same-sex marriage sadiay Thailand, kalpasan a pinirmaan ni King Maha Vajiralongkorn ti naisaingasing a gakat para iti same-sex marriage.
Gapu iti dayta, ti Thailand ti kaunaan a pagilian iti Southeast Asia a mangbigbig iti same-sex marriage ken maika-tallo iti intero nga Asia kalpasan ti Taiwan ken Nepal.
Maipalagip a naisubmitir ken napirmaan ti naisingasing a gakat idi Hunio, nu sadino agipiktibo daytoy kalpasan ti 120 nga aldaw.
Kayatna a sawen, manamnama intun Enero 22 iti sumaruno a tawen ti kaunaan a maikasar babaen iti nasao a linteg.
Iti linteg a napirmaan maipapan iti panagasawa, mausaren dagiti gender-neutral a termino a kasukat dagiti “men,” “women,” “husbands” ken “wives,” mangipaay pay daytoy a pagrebengan ti panangampon ken pangitawid kadagiti same-sex couples.
Nupay kasta, kaaduan dagiti grupo ti Buddhist ti agtalinaed pay laeng kadagiti tradisional ken konserbatibo a kultura.
