BAGUIO CITY – Siento porsiento a makaawat iti maikadua a dupag ti Social Amelioration Program (SAP) dagiti benipisaryo ti nasao a programa manipud Baguio City ken Benguet.
Impasigurado daytoy ni Department of Social Welfare and Development (DSWD)-Cordillera regional director Leo Quintilla iti interview ti Bombo Radyo – Baguio.
Inlawlawagna a maitunos daytoy iti inisyal a pagalagadan a dagiti benipisaryo kadagiti lugar a naipasidong iti Enhanced Community Quarantine idi May 1 to May 17 kas iti Baguio ken Benguet ti sigurado a makaawat iti maikadua a rikos ti SAP.
Dinakamatna nga ur-urayenda metlaeng ti listaan dagiti waitlisted manipud kadagiti lokal a gobyerno tapnu mabayadan dagitoy no sadino, dagiti waitlisted ket dagiti benipisaryo a nairaman iti listaan para iti umun a rikos ti panagited ti tulong pinansial iti SAP ngem saan a nakaawat ti kwarta.
Innayonna a dagiti adda iti waitlisted a taga-Baguio ken Benguet ket maalada ti gatad a katukad ti umuna ken maikadua a rikos ti nasao a tulong pinansial.
Sigun pay kenni Quintilla, idi kalman ket agarup 7,000 a benipisaryo manipud iti nagduduma a probinsia ti rehion ti naawatda ngem manamnama a manayonan pay gaputa agrikrikos paylaeng dagiti dadduma a lokal a gobyerno tapnu makita dagiti kwalipikado a pamilya a saan a nairaman iti umuna a rikos ti SAP.
