BAGUIO CITY – Nalpasen ti pannakaiwaras dagiti tulong pinansial iti umuna a rikos ti Social Amelioration Program (SAP) iti intero a rehion Cordillera.
Sigun ken ni Leo Quintilla, regional director ti DSWD-Cordillera, nalpasen ti payout iti 75 a munisipio ken dua a siudad iti rehion.
Kinunana a manamnama nga isubli ti 18 a lokal a gobierno iti rehion ti saan dagitoy a naiwaras a pondo para iti umuna a rikos ti SAP.
Immunan nga insubli ti Sadanga, Mountain Province ti P1.47 million a pondo ti SAP a saan a naiwaras kadagiti residente.
Sigun pay ken ni Quintilla, nalpasen ti liquidation report ti 31 a lokal a gobierno iti Cordillera.
Maibasar iti rekord ti DSWD-Cordillera, naaramat ti P1.52 billion a pondo iti implementasion ti SAP iti rehion ken nagnumar iti daytoy ti pakabuklan a 291,589 a pamilia.
