BAGUIO CITY – Nairaman ti maysa a seaman a taga-Bakun, Benguet kadagiti 26 a pimmusay iti panang-uram ti maysa a gang iti maysa a nightclub sadiay siudad ti Coatzacoalcos, Mexico idi rabii ti Martes, August 27.
Nabigbig daytoy a ni Nathaniel Apolot Alindan, 34-anyos ken 3rd engineer iti pagtatrabahuanna a barko.
Iti panakiyuman ti Bombo Radyo Baguio iti pamilya Alindan, kinunada nga agtaltalinaed ti bagi ti biktima sadiay Mexico.
Kinunada a makikokoordinardan iti Department of Foreign Affairs para iti panakaiyawid ti bangkay.
Naamuan a posible a dumanon iti makalawas ti panakaiproseso dagiti papeles ti biktima sakbay a maiyawid ditoy pagilian.
Malaksid kenni Alindan, pimmusay metlaeng iti insidete ti maysa pay a Pilipino a seaman a nabigbig a ni Bryan Varron, 26-anyos manipud Ormoc City.
Sigun kenni Ramon Guzman, agent ti barko a Caribe Lisa, nag-leave da Alindan ken Varron kalpasan a simmanglad ti barkoda sadiay Mexico manipud Houston.
Maibasar iti report, agarup alas dies ti rabii idi Martes idi rinaut dagiti armado a grupo ti El Caballo Blanco Nightclub wenno The White Horse Nightclub.
Inrikep dagiti suspek dagiti emergency exits ti nightclub sakbayda nga inuram ti entrance hall ken sakbay a pimmanawda ket kinawtiboda pay ti akinkukua iti pasdek.
Naamuan a pimmusay ti 26 a tattao ken nadangran ti 11 a dadduma pay iti nasao a panagraut.
Nabigbig metten ti kangrunaan a suspek iti krimen ken sigun kadagiti prosecutors sadiay ket siguden a nakemmeg iti napalpalabas gapu kadagiti kapada a krimen.
