BAGUIO CITY – Full force ti search and rescue operations dagiti otoridad para iti panakabirok dagiti daduma pay nga indibidual a nairaman iti panakargaay ti Baltimore bridge sadiay Maryland idi kalman ti parbangon, Marso 26.
Iti exclusive interview ti Bombo Radyo Baguio kenni Clemente Kollin Laoyan III, Bombo International News Correspondent – Maryland, USA, agturong ti cargo ship idiay Colombo idi aksidente a nadungparna ti maysa a poste ti rangtay rason a nargaay daytoy.
Sigun kenkuana, addan ti naispal a dua nga indibidual ken agrekrekober iti ospital bayat a manarimaan ti panagbirok iti daduma pay.
Iti agdama, adda iti kustodiya ti Maryland Transportation Authority ti Kapitan ti barko pakairamanan ti intero a crew para iti naan-anay nga imbestigasyon.
Awan pay ti naipadamag nu adda ti daduma a nationality a karaman iti nasao nga insidente.
Immuna metten nga inwaragawag dagiti rescuers sadiay nga agarup pito a lugan ken dua pulo nga indibidual ti natnag iti Patapsco River.
Dagus a naideklara ti state of emergency para iti dagus a deployment dagiti federal resources tapno masolusyonan ken maimbestigaran ti insidente.//Bombo Marinel Rodrigo
