LA TRINIDAD, BENGUET- Manarimaan ti panangduktal dagiti otoridad iti pakabigbigan dagiti dua nga indibidual a suspek iti napasamak a robbery idiay Poblacion, La Trinidad, Benguet idi kalman, alas tres ti parbangon.
Biktima iti nasao nga insidente ket ti 46-anyos a security guard a residente ti Quezon Hill, Baguio City.
Maibasar iti report ti La Trinidad Municipal Police Station, naiturogan ti security guard ngem nariing daytoy kalpasan a tinutukan dagiti dua a lallaki a nakasuot ti bonnet.
Inyapan dagiti suspek ti biktima iti likudan ti establishemento a bambantayanna ken ditoyda nga ingalut dagiti ima ken sakana usar ti nylon cord.
Kinubotan pay dagiti suspek ti mata ti biktima ken kinabilanda iti masking tape ti ngiwatna.
Inala dagiti suspek ti cellphone ti biktima nga agatad iti P4,000.
Dagus met a nagpatulong ti suspek kadagiti kakadwana a security guard a naka-duty iti sabali a paset ti establishemento a bambantayan dagitoy isu’t gapuna a winayawayaan daytoy.
Agtultuloy met ita ti imbestigasyon dagiti otoridad tapno maammoan ti kinasiasino dagiti suspek.//Bombo Genzel Depayso
