BAGUIO CITY – Agtultuloy a mabambantayan ti seguridad dagiti motorista nga agturong ken dumalyasat iti Kennon Road, Tuba, Benguet kalpasan a nareggaay ti paset ti bantay gapu iti agtultuloy a panagbayakabak ti tudo.
Iti pannakaiuman ti Bombo Radyo kenni PMaj. Crispin Simon, Station Commander ti Tuba MPS, passable daytoy ngem para laeng kadagiti residente.
Sigun kenkuana, maipatpatungpal ti checkpoint sadiay Camp 1 tapno masigurado a dagiti motorista a sumrek ket agnanaed iti nasao a lugar.
Malaksid iti dayta, bambantayan metlaeng dagiti kapulisan ti immunan a nareggaay a paset ti bantay sadiay Camp 6.
Agtitinnulong met dagiti miyembro iti Municipal Disaster Risk Reduction Management Office ken barangay tapno dagus a madalusan dagiti babassit a nareggaay a daga iti daduma a barangay ken sitio.
