BAGUIO CITY – Posible a maisayangkat inton Pebrero ti sumaruno a tawen ti selebrasyon ti nalatak ken mapadpadaanan a Baguio Flower Festival wenno Panagbenga.
Sigun kenni Mayor Benjamin Magalong, kasaruno daytoy ti agtultuloy a panagngato ti bilang dagiti turista a sumangsangbay ditoy siudad ken ti bumabbaba a kaso ti COVID-19.
Sigun kenkuana, napagsaritaan iti panakitaripnongda iti Baguio Flower Festival Foundation, Incorporated dagiti sumagmamano a plano a maaramid para iti nasao a pestibidad.
Kinunana a napagnumuanda ti saan pay a panakaipatungpal dagiti crowd-drawing activities kas iti Grand Street Parade.
Dinakamatna a matutukan iti pestibidad dagiti landscaping ken creativity activities.
Inisyal a napagnumuanda pay nga awan ti maisayangkat a launching event ti Panagbenga inton Enero wenno Pebrero gaputa obserbadanda paylaeng ti agbalin a kasasaad ti siudad nangrunata adda ti pangta ti Omicron variant ti COVID-19.
Maipalagip a temporaryo a nasuspindir ti Panagbenga idi napalabas a tawen gapu iti agdama a pandemya. (report ni Bombo Brigit Marcasi)
