Innayon ni Vice President Sara Duterte iti listaan dagiti agtestigo ni sigud a Senador Antonio Trillanes IV ken Ramil Madriaga.
Maibasar iti pre-trial brief ti depensa a naisubmitir iti impeachment court idi Hunio 15, panggep ti panangayabda kadagiti nadakamat a saksi tapno paneknekan nga awan ti nakaibatayanna ti alegasion iti Articles of Impeachment kontra iti Bise Presidente.
Malaksid kenni Trillanes ken Madriaga, karaman pay iti listaan dagiti posible a saksi ti sumagmamano nga opisial manipud iti Office of the Ombudsman, Office of the President, National Bureau of Investigation, Commission on Audit, Department of Budget and Management, Anti-Money Laundering Council, Philippine Statistics Authority, ken dadduma pay nga ahensia ti gobierno.
Adda metlaeng dagiti forensic experts, accountant, notaries public, ken investigative journalist a mabalin a maawagan kas paset ti depensa.
