Agsinnabali ti kapanunotan da Senate President Pro Tempore Panfilo Lacson ken Senate Minority Leader Alan Peter Cayetano seknan iti partial report iti Senate Blue Ribbon Committee iti imbestigasion iti flood control project.
Kinuwestun ni Cayetano ti partial report ken impaganetgetna a saan daytoy a naidatag ti pakabuklan a kinapudno ken rumbeng kuma a nagpokus iti pakabuklan a ladawan iti isyu.
Kinunana nga adu pay ti saan a natalantan ken adda dagiti senador metlaeng ti saan nga ummanamong iti sumagmamano a paset iti report.
Kabayatanna, kinuna ni Lacson a raraemenna ti desision dagiti kakaduana a saan a nagpirma iti report, ngem impaganetgetna nga adda karbengan ti tunggal kameng iti bukodda nga opinyon.
Iti agdama, sumagmamano laeng ti nagpirma iti partial report ken kasapulan iti siam a signature tapno maidatag iti plenario.
Nupay kasta, panggep ni Lacson nga idatag ti linaon ti report babaen iti privilege speech iti panagsubli iti session, tapno maipakaamo iti publiko ti nagdur-asan iti imbestigasion ken marisut ti mapapati a saan a pudno nga impormasion seknan iti kaso.
