Pinatgan iti Senate impeachment court secretariat ti kiddaw iti House prosecution panel a nayunan dagiti marking teams para iti panagmarka iti ebidensia iti impeachment trial ni Vice President Sara Duterte.
Sigun kenni House Prosecution Panel Legal Spokesperson Atty. Benjamin Tolosa Jr., naipaayanda iti uppat a marking teams para kadagiti dokumento seknan iti confidential funds, ken dua pay a teams para iti isyu iti unexplained wealth.
Napalawa metlaeng ti oras iti panangmarka iti ebidensia agingga iti alas-7 iti malem manipod iti sigud nga alas-5 iti malem tapno mapapartak ti proseso.
Impasigurado iti prosecution panel nga aramidenda ti amin tapno saan a maitantan ti panangrugi iti presentasion kadagiti testigo inton Hulio 6.
Sumangsango ni Duterte iti impeachment case nga impila iti House of Representatives idi Mayo gapu iti alegasion iti culpable violation of the Constitution, graft and corruption, bribery, betrayal of public trust, ken dadduma pay a nadadagsen a kaso.
