Nangipaay a dagos ti piyansa da Senator Jinggoy Estrada ken sigud a Department of Public Works and Highways (DPWH) Secretary Manuel Bonoan idiay Sandiganbayan gapu iti kaso a graft seknan iti naanomalyaan a proyekto ti DPWH a naipila kontra kadakuada.
Personal a nagturong idiay Sandiganbayan sa Senator Estrada ken Bonoan idiay Sandiganbayan ita nga aldaw.
Parehas da a nangipaay iti sag- P90,000 idiay Sandiganbayan Second Division sumagmamano nga oras a nangiruar ti Sandiganbayan ti warrant of arrest.
Iti statement ni Senator Estrada, impettengna a nagbayadda ti piyansa kas legal nga addang tapno madepensaanna ti bagi na.
Nainget met a pinaglibakanna ti nasao nga alegasyon kontra kenkuana.
Iti agdama, awan pay laeng ti statement manipud iti sigud nga opisyal ti DPWH. Apaman a nangipaay daytoy iti piyansa, dagus metlaeng daytoy nga inmikat.
Nangipaulog metten ti Second Division ti hold departure order kontra kada Estrada ken Bonoan.
Maipalagip a nangipila ti Office of the Ombudsman ti graft ken plunder kontra kada Senator Estrada ken Bonoan pakairamanan ti dadduma nga opisyal ti DPWH.
Inlawlawag met ni Assistant Ombudsman Mico Clavano ti kaso a plunder ken graft a kaso a naipila kontra kadagiti nasao nga opisyales ken mainaig iti iligal a budgetary insertions ken project allocations kadagiti proyekto ti DPWH manipud idi 2025. //bombokaren.c.sapirao
