Naitaray iti Philippine National Police General Hospital (PNPGH) ni sigud a DPWH Secretary Manuel Bonoan gapu iti nangato a blood pressure na, kalpasan a naiserbi ti arrest warrant kontra kenkuana mainaig iti plunder charges idi June 01, 2026.
Sigun kenni Interior Secretary Jonvic Remulla, naiturong iti ospital ni Bonoan kalpasan a ngimmato iti 192/100 ti blood pressure daytoy.
Innayonna a nainget a mabambantayan ni Bonoan iti ospital ken limitado laeng ti agbisita.
Agtalined iti ospital ti sigud a DPWH Secretary agingga nga ibaga ti doktor a kabaelanna ti sumangao iti panagdengngeg.
Kabayatanna, inlawlawag ni Remulla nga iti agdama ket adda iti hospital arrest ni Bonoan ngem saan paylaeng nga indicted wenno saan a pormal a naakusaran.
Maipalagip a kadua ni Sen. Jinggoy Estrada ni Bonoan a naipaulogan iti arrest warrant idi June 01, 2026, gapu iti maatap a pakainaiganda iti naanomalyaan a flood control scam iti pagilian.
