Naituding a maideport ni sigud a Negros Oriental Rep. Arnolfo Teves Jr., kalpasan a naarestar daytoy sadiay Timor-Leste idi May 27,2025.
Sigun kadagiti otoridad sadiay kasapulan a maideport daytoy gaputa awanan daytoy iti valid visa ken legal a pammalubos nga agtalinaed sadiay.
Malaksid iti dayta, kinunanada pay nga iti panagtalinaedna sadiay iti agarup dua a tawen ket nangipaay riribuk kadagiti umili sadiay.
Gapu iti dayta, ti nasao a desisyon ket ag-epektibo a dagus kas maibasar iti national legislation seknan iti migration ken asylum.
Nupay kasta, inaprobaran ti Court of Appeal sadiay ti petition for a writ of habeas corpus nga impila ti sigud nga abogadona.
Kabayatanna, maipalagip a ni Teves Jr., ket sumangsango iti kaso kas mastermind iti panakapapatay ni sigud a Negros Oriental governor Roel Degamo ken dadduma pay idi Marso a kwatro idi tawen 2023.
