Impakaammo ni sigud nga spokesperson Harry Roque a saan a dumar-ay ni sigud a President Rodrigo Duterte iti House investigation mainaig iti pannakapapatay dagiti rinib-ribu a drug suspects iti naisayangkat a police operations bayat ti administrasyonna.
Sigun kenni Roque, saan a mapilit ti Kongreso ni sigud a President Duterte nga agbalin kas saksi kontra iti bukodna a bagi.
Maipalagip nga inimbetaran ti House committee on human rights ni Duterte kaduana ni sigud a police chief, Senator Ronald “Bato” dela Rosa iti agtultuloy nga inquiry.
Nupay kasta, immunan metlaeng nga impakaammo ni Bato a saan daytoy a dumar-ay iti nasao nga imbestigasyon.
Impetteng pay ni Roque nga adda ti karbengan dagitoy a saan a dumar-ay kas maibasar iti Supreme Court decisions on People vs Ayson (1989) ken Rosete vs. Lim (2006).
Iti baet dayta, kinuna ni Duterte nga umannamong daytoy a makipaset iti aniaman a Philippine Court tapno sungbatanna dagiti aniaman a criminal accusation iti extrajudicial killings mainaig iti drug war.//Rose
