Mabalin paylaeng a maiproklamar ni sigud a President Rodrigo Duterte kas mayor ti Davao City malaksid no masentensiaan iti krimen kontra iti sangkataoan, sigun iti Commission on Elections idi kalman.
Inlawlawag ni Comelec Chairperson George Garcia nga agingga nga awan ti pinal a sentensia ti kasona, adda latta ti naganna iti balota ken maiproklamar daytoy.
Kinuna pay ni Garcia a mabalin a maiproklama dagiti kandidato iti eleksion uray awan dagitoy iti pisikal bayat ti seremonia.
Apaman a maiproklamar, kinuna ni Garcia a mabalin a pilien ti Department of the Interior and Local Government ti mangparnuay iti permanente wenno temporario a bakante iti puesto ni Duterte.
Nakalanad iti Local Government Code a ti bise gobernador wenno bise mayor ti mangala ti pagrebbengan ti maysa a gobernador wenno mayor iti bakante a posision.
Daytoy ket kalpasan a naiturong ni sigud a President Rodrigo Roa Duterte iti The Hague idiay Netherlands tapno sanguenna ti kaso daytoy seknan iti kampaniana a war on drugs bayat ti administrasionna.
