Agtultuloy latta nga imonmonitor dagiti maseknan nga opisyales ti sitwasyon iti siltation dam idiay Lower Rock Quarry Barangay, Baguio City kagiddan ti panagdalapos ti Tropical Storm Enteng.
Ito panakiuman ti Bombo Radyo kenni Silvino Cominga Jr., kapitan iti nasao a barangay, immunan a nangipatungpalda iti clean up drive iti nasao a dam tapno maliklikan ti panakaipullat dagiti basura kaspangarigan pumigsa ti tudo ken maiyanod dagitoy.
Sigun kenni Cominga, kaadwan kadagiti nakolektarda a basura ket nabubulok nu sadino, maatap nga inrana dagiti residente nga inbelleng dagitoy idi nagtudo iti ayatda a saan nga umangot dagitoy kadagiti pagtaenganda.
Maipalagip a nangipaiyulog ni Baguio City Mayor Benjamin Magalong iti pammilin idi kalman seknan iti temporaryo a saan a panangiruar kadagiti basura gapu paylaeng iti agdama a sasaden iti panawen.
Kabayatanna, kinuna ni Cominga a marikrikna dagitoy ti presensya dagiti kameng iti pulisya nga agronronda ken mangkitkita iti kasasaad iti nasao a pagayusan iti danum.// Bombo Rob Dominguez
