BAGUIO CITY – Maipatpatungpal ti special satellite registration ti Commission on Elections – Baguio para kadagiti Persons Deprived of Liberty wenno balud manipud iti Bureau of Jail Management and Penology – Baguio ita nga aldaw, Hulyo 31.
Iti interview ti Bombo Radyo kenni Atty. John Paul Martin, Election Officer ti Commission on Elections – Baguio, puntirya ti opisina dagitoy a makapagparehistro ti nasurok dua gasut a balud manipud iti Jail Male Dormitory ken tallo pulo ket lima manipud iti Jail Female Dormitory.
Iti interview pay ti Bombo Radyo iti maysa kadagiti Persons Deprived of Liberty wenno balud, pagrebbengan dagitoy nga agbotos ken kayatda met a manggeg ti bosesda iti ruar ti pagbaludan.
Malaksid iti dayta, naipatungpal ti special registration para kadagiti Persons With Disabilities nu sadino dumanon iti 169 a bilang ti nagparehistro idi kalman, Hulyo 30.
Agtultuloy met ti panagallukoy ni Atty. Martin kadagiti saan pay a nakapagparehistro a residente nga gundawayanda dagiti maipatpatungpal nga special satellite registration.
Kabayatanna, maibasar iti datus ti Commission on Elections – Baguio, nagun-oddan ti 10,000 a puntirya a bilang dagiti nagparehistro manipud nangrugi ti voters registration period idi Pebrero agingga iti agdama.
Immunan nga inwaragawag ti ahensiya nga agleppas ti voters registration inton Setyembre a trenta iti agdama a tawen.
