Naideklaran ti state of calamity kadagiti sumagmamano a lugar idiay Sarangani pakairamanan ti Malapatan ken Glan, kalpasan iti 7.8 magnitude a gingined a tinmama idiay idi Hunyo 8.
Sigun iti Philippine Institute of Volcanology and Seismology (PHIVOLCS), maysa ti Malapatan a nakapadas iti Intensity VIII iti nasao nga aldaw, maysa kadagiti kapigsaan a nailista a gingined.
Gapu iti kapigsa daytoy, temporaryo a naisara ti Masla Bridge gapu ta posible a naapektaran ti structural integrity daytoy.
Idiay met Glan, nagsara dagiti kalkalsada gapu kadagiti landslides no sadino addu a lugan ti natamaan gapu kadagiti nagsi-tennag a bato.
Sigun kenni Glan Mayor Victor James Yap, Sr., dumanon iti 20 nga indibidual ti pimmusay manipud iti munisipyo dagitoy.
Iti bisa ti maysa nga executive order, nangipatungpal ni Sarangani Governor Rogelio Pacquiao ti province-wide emergency measures tapno dagos a maipaay ti tulong kadagiti apektado.
Sumagmamano gamin a lugar, kasapulandan ti suplay ti taraon ken danum bayat a dagiti dadduma a lugar, awanan paylaeng kuryente ken signal ti komunikasyon.
Kagiddan dayta, naideklara metten ti State of Calamity idiay General Santos City no sadino sumagmamano a paset ti GenSan–T’boli–Surallah Road ti temporaryo a naisara kalpasan a naduktalan ti Department of Public Works and Highways (DPWH) a saan a natalged daytoy nga aramaten dagiti motorista. //bombokaren.c.sapirao
