BAGUIO CITY – Naideklara ti State of Emergency sadiay Sablan, Benguet kalpasan a lima a residente sadiay Barangay Poblacion ti kinagat dagiti aso nga addaan ti rabis iti bulan ti Hunyo ken Hulyo ita a tawen 2019.
Sigun kenni Vice Mayor Arthur Baldo, nailista ti kaunaan a kaso ti rabis sadiay Sablan idi June 22 ken ditoy a kinagat ti maysa nga uken a mapapati a nagtaud sadiay Burgos, La Union ti tallo nga indibidual ken nagpositibo dagitoy iti rabis.
Nailista met ti maikadua a kaso ti rabis idi July 11 kalpasan a dua nga umili ti kinagat ti aso nga addaan ti rabis bayat a ti kaudian a kaso ket ti panagpositibo ti maysa nga aso sadiay iti nasao a napeggad a virus.
Imbingayna nga aga-asideg ti lugar nga ayan dagiti aso a naduktalan nga addaan ti rabis ken ita laeng a nakailista ti Sablan iti kaso ti rabis.
Sigun iti bise mayor, nabakunaanen iti anti-rabies dagiti lima a residente nupay nainget a mabambantayan ti salun-at dagitoy bayat a nabakunaan metten dagiti 48 nga umili sadiay nga addaan risgo iti nasao a virus.
Inlawlawagna ti pagkasapulan para iti panangideklarada iti State of Emergency tapnu maaramatda ti quick response fund a paggatang ti bakuna kontra rabis.
Innayonna pay a maaramat dagiti bakuna kadagiti aso nga adda iti masakupan ti 5-kilometer radius iti Barangay Poblacion malaksid pay iti mass vaccinations kadagiti taraken nga aso ken pusa iti nasao a munisipyo. (with Bombo Charles Nikko Limon)
