BAGUIO CITY – Nakemmeg ti street level drug personality iti buy-bust operation nga insayangkat dagiti otoridad sadiay Pantar, Laya West, Tabuk City, Kalinga idi kanikadua.
Nabigbig daytoy a ni Christopher Tumaneng Buston, 32-anyos, naasawaan, karpintero ken residente ti Balong, Tabuk City, Kalinga.
Nakumpiskar kenkuana ti maysa a pakete ti mapapati a shabu bayat a narekober ti naaramat a buy-bust money.
Naipasidong metten ni Buston iti kaskenan a dokumentasyon ken naipilan ti kaso kontra kenkuana a panaglabsing iti Republic Act 9165 wenno iti Comprehensive Dangerous Drugs Act of 2002.
Insayangkat dagiti operatiba ti Kalinga Police Provincial Office (PPO), Police Regional Office Cordillera ken PDEA Kalinga ti nasao nga operasyon.
Dinayaw met ni PCol. Job Russel Balaquit, Provincial Director ti Kalinga PPO dagiti operatiba iti panagaramid dagitoy iti mandatoda kas mangipatpatungpal iti linteg iti baet ti implementasyon ti Enhanced Community Quarantine iti Luzon gapu iti COVID-19.
Sigun kenkuana, ituloy dagiti otoridad a mangkemmeg kadagiti indibidual a manggungundaway iti agdama a krisis gapu iti COVID-19 pandemic tapnu agaramid iti iligal nga aktibidad.
