Kinumpernar ni PNP spokesperson Police Brigadier General Randulf Tuaño nga impaulogen ti Philippine National Police – Criminal Investigation and Detection Group (CIDG) ti subpoena kontra kenni Senator Ronald “Bato” Dela Rosa ita a Lunes, May 11, 2026.
Maibasar iti dokumento a napetsaan iti Mayo 10, nabilin ni Dela Rosa nga agparang iti CIDG sadiay Camp Crame, Quezon City intun Huebes iti 10 a.m.
Daytoy ket kasaruno ti report seknan iti maatap nga arrest warrant nga impaulog ti International Criminal Court (ICC) kontra iti senador.
Immuna a kinuna ni Department of the Interior and Local Government (DILG) Secretary Jonvic Remulla a saan pay a personal a naimbestigaran ti senador.
Naipaulog laeng ti subpoena gapu iti sayangguseng maipapan iti “impending red notice”.
Innayon ni Remulla a mainaig paylaeng daytoy iti nasurok 100 a reklamo ti Extrajudicial Killings a napasamak iti termino ni Dela Rosa kas City Director ken Regional Director ti Davao City sadiay Mindanao.
Inyunay-unay metlaeng ti opisial a ti imbestigasion ti CIDG ket awan ti pakainaigan daytoy iti naipadamag nga arrest warrant a maatap nga impaulog ti ICC kontra kenni Dela Rosa.
Inlawlawag ni Remulla a saan a miembro ti pagilian iti ICC ken saanda a makipagtrabaho iti daytoy.
