Na-stranded ti sumagmamano a pasahero iti nagduduma a paset ti Metro Manila ita a Huebes, Marso 26, 2026.
Resulta daytoy ti dua nga aldaw a transport strike nga insayangkat ti MANIBELA kontra iti agtultuloy a panagngato ti presyo ti petrolyo.
Sigun kenni National Capital Region Police Office (NCRPO), adda paylaeng dagiti pasahero iti baet ti pakaammo a maipatungpal ti tigil-pasada, isu’t gapuna a nanayunan ti bilang dagiti naapektaran.
Nailista dagiti stranded a pasahero iti sumagmamano a lugar sadiay Manila, Quezon City, Pasig, Taguig, Parañaque, Las Piñas, ken Malabon.
Iti baet daytoy, impakaammo dagiti kameng ti pulisya nga awan ti nailista a gulo kadagiti lugar a nakaisayangkatan ti protesta.
Karaman kadagiti nakipaset iti protesta dagiti nadumaduma a sektor ti transporsyon a pakairamanan dagiti jeepney drivers, bus operators, TNVS, motorcycle taxis, ken UV Express.
Sumagmamano kadagiti kiddawda ti No To Oil Price Hike Coalition, pannakaikkat ti value-added tax (VAT), excise Tax ti produkto a petrolyo, panagbaba ti presyo ti petrolyo iti P55 tunggal litro ken pannakaibasura ti Oil Deregulation Law.
Kiddaw metlaeng dagitoy ti kanayunan a pasahe, P1,200 family living wage, ken nasyunalisasyon ti industriya ti lana tapno mapababa ti presyo daytoy.
Kabayatanna, insaganaan met ti nadumaduma nga ahensiya iti gobierno ti “libreng sakay” para kadagiti amin nga epektado a commuter.
