Nalayus ti sumagmamano a paset ti Mindanao gapu iti napigsa a panagbayakabak ti tudo idi Mierkules, July 22, 2026.
Gapu iti napigsa nga ayus ti layus, sumagmamano a nakaparada a motorsiklo ti natumba iti Barangay Cannery Site, Polomolok, South Cotabato.
Sumagmamano a lallaki ti nagtitinnulong a nangipangato kadagiti motorsiklo tapno malapdan ti pannakaiyanod dagitoy.
Awan ti nailista a nadangran iti napasamak nga insidente.
Mainaig iti dayta, narigatan dagiti motorista a dimmalyasat iti maysa a kalsada sadiay Barangay Mandug sadiay Davao City, kalpasan a nakadanun ti layus iti nasao a lugar.
Malaksid iti dayta, sumagmamano met a motorista sadiay M’lang Cotabato ti naipit gapu kadagiti natumba a kayo ken sanga a nangserra iti sumagmamano a kalsada.
Kabayatanna, naireport ti layus ken panagreggaay ti daga idiay Antipas, Cotabato a nangdadael iti sumagmamano a talon.
Sigun kadagiti otoridad, dimmanon iti agarup P2.3 milion ti mapattapatta a nadadael bayat a nasurok nga 400 a pamilia ti naapektaran ken naikkan iti tulong ti lokal a gobierno.
