Inwaragawag ti Department of Education a mandatory wenno kapilitanen nga agremedial class tunggal summer dagiti estudyante nga addaan iti nababa a reading comprehension levels.
Sigun kenni DepEd Secretary Sonny Angara, napateg ti summer remedial classes tapno saan laeng a basta maipasa dagiti estudyante nga uray nababa ti reading comprehension levels dagitoy.
Dinakamat ni Angara nga adon nga estudyante ti nagnumar iti nasao a programa gapu ta naksayan ti literacy problems ken nanayunan ti ammo dagiti ubbing.
Impeksa met ti nasao nga opisyal a nasken nga ipalubos dagiti nagannak nga agsummer class dagiti annakda gapu ta mandatory daytoy ken saanen a kas iti sigud a boluntaryo laeng.
Impeksa pay ni Angara a maysa a parikut a nakitada ket ipaspasa laengen dagiti mannursuro dagiti estudyanteda tapno maliklikan ti kanayonan a trabahoda.
Impetteng met ti Department of Education nga agdesignarda kadagiti mannursuro nga agsuro iti summer remedial classes tapno marisut ti nasao a pakaseknan.
