Ibilbilang ni Vice President Sara Duterte a ti kellaat a rally ti Iglesia Ni Cristo iti EDSA White Plains ket mangiladawan kadagiti nabayagen nga arungaingna kontra iti gobierno.
Sigun kenkuana, ti protest action a naipatungpal ket mangipakita iti arungaingna sipud pay idi 2024
Innayon ti bise presidente a pammaneknek laeng daytoy iti maatap kinakapoy ti agdama nga administrasion.
Sigun pay kenni Duterte, saan maipapaayan iti solusion ken saan a bigbigen ti gobierno dagiti pudno a parikut dagiti umili.
Sumagmamano kadagiti kinunana nga isyu ket ti agtultuloy a panagngato ti presio dagiti tagilako, kinakurang ti panggedan, ken ti maipagarup a kinaawan panagraem ni President Ferdinand Marcos kadagiti reklamo dagiti umili.
Inakusaran pay ti Bise Presidente nga ar-aramaten ti administrasion ni Presidnet Marcos ti justice system a mangidarum ken mangibalud kadagiti amin nga indibidual a mangbabalaw iti gobierno.
Kabayatanna, pinagkedkedan ti Malacañang dagiti pammabasol ni VP Sara.
Sigun kenni Palace Press Officer Usec. Claire Castro, dagiti kaso a naipila kontra iti sumagmamano a personalidad ket resulta ti pannakaipatungpal ti linteg ken saan pannangidadanes kadagiti kritiko ti administrasion.
Innayon ni Castro nga awan ti pilpilien ti administrasion a personalidad iti panangsungbat kadagiti nairaman iti maatap nga anomalia.
Kinunana nga ad-adda nga aktibo ita ti gobierno iti panagimbestigar kadagiti iregularidad, pakairamanan dagiti mapagduaduaan a flood control projects a maatap a saan nga inkankano ti napalabas nga administrasion.
