BAGUIO CITY – Manarimaanen ti panakaisayangkat ti Community Based Monitoring System (CBMS) kadagiti babbarangay ditoy siudad ti Baguio nga agleppas iti maikatlo a lawas ti Enero ti sumaruno a tawen.
Sigun kenni Baguio City DRRM Officer II Cyr Bagayao, mismo a ti lokal a gobyerno Baguio ti nangkiddaw iti panakairaman ti siudad kadagiti pilot areas a pakaisayangkatan ti CBMS.
Dinakamatna a manarimaan ti house-to-house a panagkolektar dagiti grupo dagiti enumerators kadagiti impormasyon manipud kadagiti umili ditoy siudad.
Kinunana nga iti agdama ket adda dagiti enumerators sadiay Irisan, Asin ken Bakakeng.
Puntirya ti lokal a gobyerno a maipasidong iti CBMS ti nasurok 105,000 a babbalay manipud kadagiti 128 a barangay ti siudad.
Imbinglay pay ni Bagayao a gimmatang ti lokal a gobyerno iti 390 nga android tablets nga ar-aramaten ita dagiti enumertors a mangisaysayangkat iti nasao a survey.
Naamuan pay a nangilatang ti lokal a gobyerno ti Baguio iti P45-M manipud iti pondo ti Disaster Risk Reduction and Management para iti panakaisayangkat ti nasao a survey.
Innayonna a napateg ti survey gaputa makatulong ti maala nga impormasyon iti panakabukel ken panakaimplementar dagiti programa a makatulong iti pagkasapulan dagiti umili ken mabigbig dagiti umno a pakailatangan ti pondo ti siudad.
Kabayatanna, pinunas ti lokal a gobyerno ti Baguio ti panag-amak dagiti umili ti siudad a mangipaay ti impormasyon iti manarimaan a survey para iti CBMS.
Sigun kenni Bagayao, saan a pulos a maaramat dagiti maala nga impormasyon dagiti umili iti iligal a banag.
Inyunay-unayna a lehitimo ken naipasidong dagiti enumerators iti nainget a panagsanay.
Kinunana a ti pakakitaan a lehitimo dagiti enumerators ket addaan dagitoy ti ID ken ken adda ti kadwada a baranggay officials iti panagturongda kadagiti babbalay tapnu mangisayangkat ti panagdamag.
Innayonna nga intedda metlaeng kadagiti barangay officials ti nagan dagiti enumerators a nadutukan a mangisayangkat ti survey kadagiti maseknan a barangay ditoy siudad.
Maibasar iti Republic Act 11315 wenno CBMS Law, karaman kadagiti impormasyon a maala kabayatan ti survey ket ti sitwasyon kadagiti partikular nga isyu kas iti salun-at, nutrisyon, danum, pagnanaedan, edukasyon, pamastrekan, empleyo, seguridad, partisipasyon, lokasyon ti pasdek, housing units, service institution, imprastraktura, natural resources, proyekto ti gobyerno ken estado dagiti proyekto ti gobyerno.
Immuna metten a kiniddaw ni Philippine Statistics Authority – Baguio-Benguet chief statistical specialist Imelda Buyuccan ti kooperasyon ken panakipaset dagiti umili iti survey babaen iti panangbigbigda iti kameng ti pamilyada a makaipaay ti impormasyon kadagiti enumerators para iti umno ken pudno nga impormasyon.
Inyunay-unayna a babaen iti daytoy ket siento porsiento a makita ti pudno a kasasaad dagiti komunidad ken dagiti umili.
