BAGUIO CITY – Insumitiren ti pulisya iti Regional Joint Security Coordinating Council (RJSCC) ti resulta ti imbestigasyon ken assessment dagitoy iti maatap a panangsipat ti re-electionist a mayor ti Bangued, Abra iti tallo nga empleyado ti municipal government a supporters ti kalabanna a pulitiko.
Iti panakiyuman ti Bombo Radyo kenni Bangued Election Officer Atty. John Paul Martin, kinunana a nailanad iti resulta a ‘suspected election-related incident’ wenno maatap nga adda koneksionna iti masungad nga eleksion ti napasamak nga insidente.
Sigun kenkuana, naibasar ti resulta iti parameters ti Philippine National Police iti panakabigbig no anya dagiti maikonsidera nga election-related incidents.
Innayonna nga ita ket tingtingitingen ti regional council ti nasao a report ti pulisya.
Nupay kasta, dinakamat ni Atty. Martin a mangisayangkat iti naisina nga imbestigasyon ken panagadal ti regional council ken aniaman a resulta ket maisumitir iti COMELEC Central Office para iti umno nga aksion.
Kabayatanna, kinuna ni Atty. Martin nga iti kaudian a taripnong ti regional council ket inkari ti Cordillera PNP ti panangipaayda iti kanayonan a pwersa sadiay Abra a maiwaras iti nagduduma a munisipyo sadiay.
