--Ads--
BAGUIO CITY – Maan-anup ita ti naglibas a suspek iti naisayangkat nga anti-illegal drug operation sadiay Barangay Pandayan, Tadian, Mt Province idi Abril 23.
Nagturong ti Tadian Municipal Police Station ken daduma pay a yunit ti ahensiya iti pagtaengan ti suspek tapno ipatungpal ti search warrant ngem nakalibas ti daytoy.
Iti nasao nga operasyon, nakumpiskar ti tallo a pakete ti maatap a shabu (methamphetamine), maysa pay a pakete ti maatap a shabu ken daduma pay a drug paraphernalia.
Naiturong iti Tadian MPS dagiti nakumpiskar nga ebidensiya para iti umno a dokumentasyon.
Sumango ti suspek iti kaso a panaglabsing iti Republic Act 9165 wenno ti Comprehensive Dangerous Drugs Act of 2002 apaman a matiliw daytoy.//Bombo Jerwin Aquino
