LA TRINIDAD, BENGUET – Boluntaryo a simmuko kadagiti otoridad ti 37-anyos a lalaki kalpasan a maatap a pinaltuganna ti kainumanna idiay Km3, Balili, La Trinidad, Benguet idi Agosto 23.
Maibasar iti report ti La Trinidad Municipal Police, ti biktima a lalaki ket agtawen iti 35, tubo ti Quirino Province ken boarder iti nasao a lugar.
Ti suspek ket tubo ti Kalinga ken boarder metlaeng idiay Balili, La Trinidad, Benguet.
Sigun kadagiti residente, naaddaan iti nabara nga argumento ti biktima ken ti suspek bayat ti panag-iinum dagitoy.
Sumagmamano a minutos ti napalabas ket nakangngeg dagiti residente iti kanalbuong ti paltog.
Saan dagitoy a dagus a napan iti nakapasamakan ti insidente gapu iti buteng dagitoy.
Idi nadlawda a nagtalna ti aglawlaw ket rinumwarda ken ditoyda a nakitada ti biktima a nakadasay ken dara-dara ti ulona.
Dagus met a napakaammoan ti agtagikua iti balay a pagborboardingan ti biktima ken ti suspek rason a naitawag ti insidente kadagiti otoridad.
Maysa nga aldaw ti napalabas ket simmuko metlaeng ti suspek a kinadwaan ti kabsatna.
Sumangsango ti suspek iti kaso a pammapatay.
