TABUK CITY – Manarimaan ti nainget nga imbestigasyon ti Tabuk City Police Office para iti panakabirok ken pakabigbigan dagiti suspek nga adda iti likodan ti panagtakaw iti maysa a pharmacy idiay Bulanao, Tabuk City, Kalinga.
Maibasar iti inisyal nga imbestigasyon dagiti otoridad, pinuntirya dagiti agtatakaw ti establishimento iti alas syete ti rabii ti Hulyo 31 ken alas dos ti parbangon ti Agosto uno, iti agdama a tawen.
Ti biktima ket 49-anyos a residente ti Purok 7, Bacras, Bulanao, Tabuk City, Kalinga.
Naduktalan dagiti maseknan a nagna dagiti suspek iti main door ti maika-dua a kadsaaran ti maysa a pasdek sakbay a nakastrekda iti nasao a pharmacy.
Nupay man naka-padlock, nabaelan dagiti agtatakaw a dinadael daytoy babaen iti panangputedda iti padlock.
Inala dagiti suspek ti laptop ken P12-K a kwarta manipud iti nasao nga establishismento.
Mapalpalagipan ti publiko nga agbalin a naridam kontra kadagiti agtatakaw tapno dagus a maireport ti insidente iti maseknan nga opisina dagiti otoridad.//Bombo Jez Lapizar & Bombo Marinel Rodrigo
