Saan pay a nangipaay iti komento to kampo ni suspended Bamban, Tarlac Mayor Alice Guo kalpasan nga naikkat daytoy manipud iti Partido-politikal a National People’s Coalition (NPC).
Immuna iti daytoy, imbilin ni NPC chairman ken sigud a Senate President Vicente “Tito” Sotto III ti panakaikkat ni Guo iti listaan dagiti miyembro ti partido dagitoy kalpasan a naawatna ti petisyon manipud kenni Tarlac Gov. Susan Yap.
Daytoy ket gapu iti panakairaman ni Guo iti iligal nga operasyon ti Philippine offshore gaming operator wenno Pogo hub.
Maibasar iti petisyon, saan a nakaipaay ni Guo iti makakumbinsir nga ebidensiya nga awan ti kinapudno dagiti akusasyon kontra kenkuana.
Maipalagip nga sinuspendir ti Office of the Ombudsman ni Guo kasaruno ti reklamo nga impila ti Department of Interior and Local Government (DILG) kontra kenkuana.
Kinasuan pay daytoy ti pulisya ken ti Presidential Anti-Organized Crime Commission iti qualified human trafficking.//Bombo Alfred Pudsoc
